Заманауи білім берудегі жаңа мүмкіндік
Қазіргі білім беру жүйесі цифрлық технологиялардың қарқынды дамуымен бірге жаңаша бағытта дамып келеді. Соның ішінде жасанды интеллект мүмкіндіктерін білім беру үдерісіне енгізу – уақыт талабы. Бүгінгі мұғалім тек білім беруші ғана емес, сонымен қатар заманауи технологияларды тиімді қолдана алатын шығармашыл педагог болуы қажет. Осы мақсатта Түркістан облысы, Жетісай ауданы, N10 «Қайнар» мектеп-гимназия» коммуналдық мемлекеттік мекемесінде аймақтық семинар аясында «Жасанды интеллекті қолдану арқылы Lesson Study үдерісін жетілдіру» тақырыбында коучинг сабақ өткізілді.
Коучинг сабақты орыс тілі мен әдебиеті пәнінің мұғалімі Дербісбек Әйгерім Ақанқызы ұйымдастырып, жүргізді. Іс-шараның негізгі мақсаты – мұғалімдерге Lesson Study үдерісінде жасанды интеллект құралдарын тиімді қолдану жолдарын таныстыру, педагогтердің цифрлық сауаттылығын арттыру және заманауи оқыту тәжірибелерімен бөлісу болды.
Семинар барысында қатысушы педагогтер жасанды интеллект платформаларының сабақ жоспарлау, тапсырма құрастыру, оқушының білім деңгейін саралау, кері байланыс беру және рефлексия жасау кезеңдеріндегі тиімділігімен танысты. Сонымен қатар Lesson Study циклдерін ұйымдастыруда ЖИ мүмкіндіктерін пайдалану арқылы уақыт үнемдеу, шығармашылық идеяларды дамыту және зерттеу сабақтарының сапасын арттыру жолдары көрсетілді.
Коучинг сабақ ерекше белсенді форматта өтті. Мұғалімдер топтық жұмыстарға қатысып, практикалық тапсырмалар орындады, цифрлық платформалармен жұмыс жасап көрді. Қатысушылар жасанды интеллект құралдарының сабақ үдерісіндегі тиімділігін тәжірибе жүзінде байқап, өз пәндеріне бейімдеу жолдарын талқылады. Әсіресе мұғалімдерге сабаққа қажетті материалдарды қысқа уақытта дайындау, оқушылардың қажеттілігіне сай сараланған тапсырмалар құрастыру және бағалау жұмыстарын жеңілдету мүмкіндіктері ерекше қызығушылық тудырды.
Семинар қатысушылары коучингтің мазмұны заманауи талаптарға толық сай екенін атап өтіп, өз тәжірибелеріне жаңа серпін алғандарын жеткізді. Коучинг барысында ұсынылған идеялар мен әдіс-тәсілдер педагогтерге жаңа бағыт беріп, Lesson Study үдерісін жаңаша ұйымдастыруға мотивация сыйлады.
Білім беру саласындағы цифрлық өзгерістер мұғалімнен үздіксіз ізденісті талап етеді. Сондықтан жасанды интеллект мүмкіндіктерін тиімді пайдалану – сапалы білім берудің маңызды тетіктерінің бірі. N10 «Қайнар» мектеп-гимназиясында өткен бұл аймақтық семинар педагогтердің кәсіби дамуына ықпал етіп, тәжірибе алмасудың маңызды алаңына айналды.
Дербісбек Әйгерім Ақанқызы,
N10 «Қайнар» мектеп-гимназия»КММ-нің орыс тілі мен әдебиеті пәнінің мұғалімі
Жетісай ауданы
