Балабақша – мектепке дейінгі білім беру ұйымы. Ол – баланың тұлға болып қалыптасуындағы алғашқы әлеуметтік орта. Балабақшаға барған бала тек қана қарапайым білім алып қоймайды, сонымен қатар өз қатарларымен қарым-қатынас жасауды, үлкендерді сыйлауды, қоғамдағы тәртіп пен ережелерді сақтауды үйренеді. Мектепке дейінгі кезең – баланың дамуы үшін ең маңызды шақ.
Балабақша жұмысының басты мақсаты – баланың жан-жақты дамуына жағдай жасау. Мұнда бірнеше бағытқа көңіл бөлінеді:
— Зияткерлік даму – санау, оқу, ойлау, есте сақтау қабілеттерін жетілдіру;
— Әлеуметтік тәрбие – ұжымда ойнау, бір-бірімен тіл табысу, достық қарым-қатынас орнату;
— Дене тәрбиесі – түрлі қимылды ойындар мен спорттық жаттығулар арқылы денсаулықты нығайту;
— Эстетикалық тәрбие – ән айту, сурет салу, би билеу арқылы баланың өнерге қызығушылығын арттыру;
— Еңбек тәрбиесі – қарапайым еңбекке баулу, тазалық пен ұқыптылыққа үйрету.
Балабақшадағы басты тұлға – тәрбиеші. Тәрбиеші баланың екінші анасы іспетті. Ол әрбір балаға сүйіспеншілікпен қарап, олардың қабілеттерін дамытады. Тәрбиешінің кәсіби білімі мен мейірімді қарым-қатынасы баланың психологиялық дамуына зор ықпал етеді. Баланың бойындағы жақсы қасиеттерді қалыптастыруда тәрбиешінің рөлі ерекше.
Балабақша – мектепке барар алдындағы дайындық кезеңі. Мұнда балалар әріптерді танып, қарапайым есептерді шығарады. Жазу, сурет салу, ойлау қабілеттерін дамытады. Осылайша, мектеп табалдырығын аттаған бала жаңа ортаға тез бейімделіп, білім алуға дайын болады.
Балабақша мен ата-ана арасындағы байланыс үзілмеуі тиіс. Баланың үйдегі және балабақшадағы тәрбиесі бір-біріне сәйкес келгенде ғана жақсы нәтиже береді. Ата-аналар жиналысы, ашық сабақтар, түрлі мерекелік шаралар осы байланысты нығайтады.
Қорыта айтқанда, балабақша – баланың болашағына берік негіз қалайды. Бұл жерде бала білім алып қана қоймай, тұлға ретінде қалыптасады. Балабақшадағы тәрбиенің нәтижесінде бала мейірімді, еңбекқор, білімге құштар болып өседі. Сондықтан әрбір ата-ана баласын мектепке дейінгі ұйымға беріп, оның жан-жақты дамуына жағдай жасауы қажет.
Суиндикова Айнур Зикраевна,
«Бақнұр» бөбекжай- балабақшасының тәрбиешісі.
Жетісай ауданы.
