Табиғатты қорғау – әр адамның азаматтық жауапкершілігі. Қоршаған ортаның тазалығы мен табиғи байлықтарды сақтау тек белгілі бір мекеменің немесе ұйымның міндеті емес, баршамызға ортақ парыз деп білемін. Осы мақсатта елімізде жүзеге асып жатқан «Таза Қазақстан» экологиялық акциясы табиғатты аялауға, туған жердің тазалығын сақтауға және экологиялық мәдениетті қалыптастыруға бағытталған маңызды бастама.
Мен, мектебіміздің биология пәнінің мұғалімі ретінде, жас ұрпаққа табиғатты қорғаудың маңызын түсіндіруді өзімнің кәсіби міндетімнің бір бөлігі деп санаймын. Себебі биология сабағында берілетін білім табиғатты тек танып-білумен шектелмей, оны қорғауға деген жауапкершілікті қалыптастыруы қажет.
Осы бағыттағы ізденісімнің бір көрінісі – «BIO LIFE» байқауына қатысуым. Байқаудың аудандық кезеңінде жоғары нәтиже көрсетіп, жүлделі І орынға ие болып, облыстық кезеңге жолдама алдым. Ал облыстық кезеңде де өз білімім мен кәсіби тәжірибемді ортаға салып, жүлделі ІІ орынның иегері атандым.
Бұл жетістік мен үшін тек байқаудағы жүлде ғана емес, биология ғылымына, табиғатты қорғау мәселелеріне деген қызығушылығымды одан әрі арттырған маңызды белес болды. «BIO LIFE» жобасы арқылы табиғи ортаны қорғау, биологиялық алуантүрлілікті сақтау және экологиялық мәдениетті қалыптастыру бағытындағы білімімді жетілдіре түстім.
«Таза Қазақстан» акциясына қатысу арқылы мен табиғатты қорғау идеясын тек сөз жүзінде емес, нақты іс арқылы насихаттауға үлес қосып келемін. Оқушыларды мектеп ауласын таза ұстауға, өсімдіктерге қамқорлық жасауға, қоршаған ортаға ұқыпты қарауға шақыру – күнделікті жұмысымыздың маңызды бөлігі. Әрбір отырғызылған көшет, тазартылған аумақ, табиғатты аялауға бағытталған әрбір игі іс – туған жеріміздің көркеюіне қосылған үлес.
Ұстаз ретінде мен үшін ең маңыздысы – оқушыға білім беріп қана қоймай, оның бойына табиғатқа деген сүйіспеншілік пен жауапкершілік сезімін қалыптастыру. Өйткені бүгінгі оқушы – ертеңгі ел азаматы. Табиғатты қорғауды бала кезден үйренген ұрпақ қана қоршаған ортаның болашағына бейжай қарамайды.
«Таза Қазақстан» – қоршаған ортаны тазарту акциясы ғана емес, ол – тазалықты өмір салтына айналдыруға үндейтін ортақ қозғалыс. Сондықтан мен де биология пәнінің мұғалімі ретінде осы игі бастамаға өз еңбегіммен, біліміммен және оқушыларыммен бірге атқарған жұмыстарым арқылы үлес қоса беремін.
Туған жердің табиғатын қорғау – баршамыздың ортақ міндетіміз. Табиғатты аялай отырып, болашақ ұрпаққа таза әрі көркем Қазақстанды аманат ету – біздің қолымызда.
Медетбеков Сейткерім Ғаниұлы,
№10 «Қайнар» мектеп-гимназия» коммуналдық мемлекеттік мекемесінің биология пәні мұғалімі.
Жетісай ауданы.
