Дене шынықтыру – мектеп бағдарламасындағы оқушының денсаулығы мен жан-жақты дамуына тікелей әсер ететін маңызды пәндердің бірі. Қазіргі заманда балалардың бос уақытының көп бөлігін телефон, компьютер және басқа да электронды құрылғылар алдында өткізуі олардың қимыл-қозғалысын азайтып отыр. Сондықтан мектептегі дене шынықтыру сабақтарының маңызы бұрынғыдан да арта түсуде.
Дене шынықтыру сабағы ең алдымен оқушының денсаулығын нығайтуға көмектеседі. Жаттығулар жасау арқылы адамның бұлшық еттері шынығып, жүрек-қан тамырлары мен тыныс алу жүйесінің жұмысы жақсарады. Тұрақты қозғалыс денені сергек ұстап, түрлі аурулардың алдын алуға ықпал етеді. Сонымен қатар спортпен айналысатын оқушылардың төзімділігі, ептілігі, шапшаңдығы мен күш-қуаты артады.
Бұл пәннің пайдасы тек денсаулықпен шектелмейді. Дене шынықтыру сабақтары оқушыларды тәртіпке, жауапкершілікке және табандылыққа тәрбиелейді. Спорттық ойындар кезінде оқушылар бір-бірімен қарым-қатынас жасап, топпен жұмыс істеуді үйренеді. Жеңіске жету үшін өзара қолдау көрсету, ережені сақтау және қарсыласын құрметтеу сияқты маңызды қасиеттер қалыптасады. Бұл дағдылар баланың күнделікті өмірінде де үлкен рөл атқарады.
Дене шынықтыру сабақтары оқушының оқу үлгеріміне де оң әсер етуі мүмкін. Қимыл-қозғалыстан кейін бала өзін сергек сезініп, сабаққа деген зейіні артады. Белсенді өмір салтын ұстану көңіл күйді жақсартып, шаршауды азайтады. Сондықтан дене шынықтыруды басқа пәндерден кем көруге болмайды.
Мектептегі дене шынықтыру сабағы оқушылардың спортқа деген қызығушылығын оятып, олардың болашақта салауатты өмір салтын қалыптастыруына негіз болады. Әрбір бала өзіне ұнайтын спорт түрін таңдап, бос уақытын пайдалы өткізуге дағдылануы қажет.
Қорыта айтқанда, дене шынықтыру – дені сау, шымыр әрі белсенді ұрпақ тәрбиелеудің маңызды құралы. Сондықтан оқушылар бұл пәнге жауапкершілікпен қарап, күнделікті өмірінде де қимыл-қозғалысқа жеткілікті көңіл бөлуі керек. Денсаулық – адам өміріндегі ең үлкен байлық, ал оны сақтаудың тиімді жолдарының бірі – тұрақты түрде дене шынықтырумен айналысу.
Қосай Сапармуратов,
«М.Шоқай атындағы № 26 ЖББМ» КММ-нің дене шынықтыру пәні мұғалімі.
Жетісай ауданы.
